देउवा सरकारमा यसरी हुँदैछ मन्त्रालयको भागबण्डा

राजधानी पत्र July 15, 2021 मा प्रकाशित (२ साल अघि) अनुमानित पढ्ने समय : ० मिनेट

प्रधानमन्त्री शेरबहादुर देउवाले मन्त्रिमण्डल विस्तार गर्न नेकपा एमाले र जनता समाजवादी पार्टीका लागि केही दिन पर्खिने रणनीति बनाएका छन् । एमालेमा माधव नेपाल र जसपामा उपेन्द्र यादव समूह परिस्थिति हेरेर देउवाले मन्त्रिमण्डल विस्तार गर्ने काँग्रेस नेताहरूले बताएका छन् ।एमालेको कार्यदलमा पार्टी एकताका लागि १० बुँदे सहमति भए पनि अध्यक्ष केपी ओली र वरिष्ठ नेता नेपालबीचको टकराव बढ्दो छ । बुधबार मात्रै ओलीले एमालेमा माधव नेपाललाई कुनै स्थान भएको घोषणा गरेको अवस्था छ ।जसपामा पनि अध्यक्षद्वय यादव र महन्थ ठाकुरबीच पार्टी आधिकारिकताको लडाइ चलिरहेको छ ।

प्रधानमन्त्री बनाउन राजनीति र न्यायिक लडाइमा साथ दिएका नेपाल र यादव पक्षलाई साथमै लिएर जाने देउवाको तयारी छ । विश्वासको मत सिद्ध गर्न पनि देउवालाई नेपाल र यादव पक्षको साथ अनिवार्य छ ।अन्तिमसम्म एमालेका २३ र जसपाका १२ जना सांसदको साथ पाएपछि सर्वोच्च अदालतको परमादेशबाट मंगलबार देउवा प्रधानमन्त्री बनेका छन् । मंगलबार देउवाले काँग्रेस र माओवादीबाट दुई/दुई जनालाई मात्र समावेश गरेर मन्त्रिमण्डल गठन गरेका छन् ।

नेपाल र यादव समूहको पर्खाइमा विपक्षी गठबन्धनको शीर्ष तहमा मन्त्रालयको भागबण्डा पनि हुन सकेको छैन । यद्यपि नेपाल समूह एमालेमै रहने परिस्थितिमा काँग्रेसले ५० प्रतिशत मन्त्रालय आफूसँगै राख्ने रणनीति बनाएको छ ।माओवादी केन्द्रलाई ३० प्रतिशत र जसपाको यादव पक्षलाई २० प्रतिशत मन्त्रालय दिने प्रधानमन्त्री देउवाले तयारी गरेको बूढानीलकण्ठ स्रोतले रातोपाटीलाई जानकारी दियो ।

नेताहरूका अनुसार माधव पक्षले विश्वासको मत दिएर एमालेबाट बाहिरिने जोखिम उठाए काँग्रेस आफू तीन/चारवटा मन्त्रालयमा पनि सीमित भएर नेपाल पक्षलाई पर्याप्त मन्त्रालय दिन तयार देखिएको छ ।गठबन्धनको अर्को घटक नेकपा माओवादी केन्द्रले पनि माधव नेपाल पक्षका लागि छाड्न तयार रहेको बताउँदै आएको छ । मन्त्रिमण्डलमा सन्तुलन मिलाउने कुरामा माओवादी केन्द्रले उदारताको नीति राख्ने गुरुङको भनाइ छ ।  यसैबीच एमालेका वरिष्ठ नेता माधवकुमार नेपालले केपी शर्मा ओलीले पार्टी एकताको ढोका बन्द गरेको बताउँदै अब आगामी चुनावसम्म एमालेसहितको राष्ट्रिय एकताको सरकार बनाउनुपर्ने बताएका छन् ।