प्रधानमन्त्री देउवाले विश्वासको मत पाउदैनन् भन्नेको बोली नै बन्द गराइदिने यो तथ्य !

राजधानी पत्र July 18, 2021 मा प्रकाशित (२ साल अघि) अनुमानित पढ्ने समय : ० मिनेट

काठमाडौं । प्रधानमन्त्री शेरबहादुर देउवाले प्रतिनिधि सभामा केही दिन भित्रमा नै विश्वासको मत लिने भएका छन् । नेपाली कांग्रेस, माओवादी केन्द्र, नेकपा एमालेको माधव नेपाल समूह तथा जसपाको उपेन्द्र यादव र राष्ट्रिय जनमोर्चाको गठवन्धनबाट १४६ सांसदको हस्ताक्षरसहित प्रधानमन्त्री बनेका देउवाले प्रतिनिधि सभामा केही दिन भित्रैमा विश्वासको मत लिने भएका हुन् ।प्रतिनिधि सभा बैठक आइतबारबाट शुरु हुँदैछ । २८ असारमा सर्वोच्च अदालतले केपी शर्मा ओली नेतृत्वको सरकारले गरेको प्रतिनिधि सभा विघटनको निर्णयलाई बदर गर्दै पुनर्स्थापना गरिदिएको थियो भने देउवालाई प्रधानमन्त्री बनाउन परमादेश दिएको थियो ।

देउवा २९ असारमा प्रधानमन्त्री बनेका थिए । संवैधानिक प्रावधान अनुसार प्रधानमन्त्री देउवाले प्रधानमन्त्री नियुक्त भएको ३० दिनभित्र संसदबाट विश्वासको मत लिनै पर्छ । प्रधानमन्त्री देउवालाई सत्ता गठवन्धन आबद्ध सबै दलले विश्वासको मत दिने प्रतिबद्धता जनाइसकेका छन् ।केही दिनयता निरन्तर भइरहेको गठवन्धनका शीर्ष नेताहरुको भेटघाट र छलफलबाट पनि विश्वासको मत लिने वातावरण कायम रहेको भन्दै तत्काल संसदबाट विश्वासको मत लिएर सरकार अघि बढ्नु पर्ने मत आउन थालेको छ ।

‘प्रधानमन्त्री बनाउँदा सघायौं, अब विश्वासको मतमा पनि सघाउँछौं भन्नेमा माधव पक्ष र उपेन्द्र पक्षसहित गठवन्धन दृढ छ, प्रधानमन्त्रीले यसै साता विश्वासको मत लिनुहुन्छ’, कांग्रेस नेता मीन विश्वकर्माले भने ।उनले मन्त्रीमण्डल विस्तार पहिले कि विश्वासको मत पहिले भन्नेमा भने पाँच दलीय गठवन्धनमा आबद्ध नेताहरु बीच शीर्ष तहमा छलफलमा र बहस जारी रहेको बताए । देउवालाई प्रधानमन्त्रीमा नियुक्त गर्न माग गर्दै तत्कालीन विपक्षी गठवन्धनमा रहेका १४६ सांसदले समर्थन गरेकोमा अहिले सो संख्या नाघ्ने सत्ता पक्ष बनेको गठबन्धनको दाबी छ ।

‘पहिले १४६ सांसदले हस्ताक्षर गर्नु भएको थियो, अहिले त्यो संख्या बढ्ने क्रममा छ, एमाले र जसपाबाट केही साथीहरु विश्वास दिनेमा बढ्नु हुन्छ, हामी ढुक्क छौं,’ माओवादी केन्द्रका एक नेताले भने ।प्रधानमन्त्रीमा देउवालाई सघाउन कांग्रेसका ६१, माओवादी केन्द्रका ४९, एमालेको माधव पक्षका २३, जसपा यादव पक्षका १२ र राष्ट्रिय जनमोर्चाका एक सांसदले हस्ताक्षर गरेका थिए । तर अहिले माधव नेपाल पक्ष र जसपाको यादव पक्षमा अझै केही सांसद थपिने सम्भावना रहेको बताइन्छ । अनलाइन मार्गबाट