‘ताइवानमा अमेरिकी सेना रहेको चीनलाई पहिला नै थाहा थियो’

November 5, 2021 मा प्रकाशित (१ साल अघि) अनुमानित पढ्ने समय : ० मिनेट

ताइवानकी राष्ट्रपति त्साई इङ वेनले ताइवानमा अमेरिकी सेनाको उपस्थिति रहेको पुष्टि गरेकी छिन्। यससँगै ताइवानबारे अमेरिका–चीन तनाव झनै चर्किन सक्ने देखिएको छ। यद्यपि चिनियाँ सेनाका विश्लेषकले भने ४० वर्षअघि देखि नै चीनलाई अमेरिकी सेनाको उपस्थिति थाहा भएको बताएका छन्। साउथ चाइना मर्निङ पोस्टका अनुसार चीनले अमेरिकी सेनाको उपस्थितिबारे थाहा भए पनि त्यसलाई खासै वास्ता गरेको थिएन। समाचारमा उल्लेख गरिएअनुसार सन् १९८० देखि नै अमेरिकी सेना ताइवानमा उपस्थित थिए।

त्यतिबेला उनीहरु सम्पर्क कार्यालयको अधिकारीको रुपमा ताइवानमा रहँदै आएका थिए। सन् १९७९ मा अमेरिका र ताइवानको कूटनीतिक सम्बन्ध सकिएपछि अमेरिकी सेनाले आफ्ना अधिकारीहरुलाई ताइवानमा राख्दै आएको चिनियाँ सेनाको स्रोतले बताएको छ।

स्रोतका अनुसार ताइवानमा करिब एक दर्जन निम्न वरीयताका सैनिक अधिकारी रहँदै आएका छन्। अहिले अमेरिकाले ल्याएका ताइवान सम्बन्ध ऐनमा अमेरिकाले ताइवानलाई निरन्तर सुरक्षा सहयोग प्रदान गर्ने उल्लेख छ। साथै उसले ताइवानलाई हतियार पनि बेच्न सक्छ। तर, चीनले यसको विरोध गर्दै आएको छ। अन्य जानकारहरुले पनि ताइवानमा अमेरिकी सेनाको उपस्थिति चीनबाट नलुकेको स्पष्ट पारेका छन्। यसअघि अमेरिकाले ताइवानमा आफ्ना सेना राखे पनि सार्वजनिक रुपमा घोषणा भने गरेको थिएन। यसमा चीनले आपत्ति जनाउँदै आए पनि यसले ठूलो रुप भने लिएको थिएन। तर, ताइवानकी राष्ट्रपतिले यसको पुष्टि गरेपछि भने अवस्था फेरिएको हो।  नेपालखबरबाट