निगमले फेरि बढायो पेट्रोलियम पदार्थको मूल्य

July 4, 2022 मा प्रकाशित (११ महिना अघि) अनुमानित पढ्ने समय : १ मिनेट

काठमाडौं- नेपाल आयल निगमले पेट्रोल, डिजेल, मट्टीतेल र हवाइ इन्धनको मूल्य फेरि वृद्धि गरेको छ। सोमबार राति १२ बजेदेखि लागू हुने गरी एक लिटर पेट्रोलमा २ रूपैयाँ र डिजेल/मट्टीतेलमा ९ रूपैयाँ र हवाइ इन्धनआन्तरिकमा ५ रूपैयाँ बढाएको हो।

योसँगै अब काठमाडौं उपत्यकामा पेट्रोल १८१ रूपैयाँ, डिजेल र मट्टीतेल १७२ रूपैयाँ लिटर पर्ने भएको छ। हवाइ इन्धन आन्तरिकतर्फको मूल्य १९० रूपैयाँ लिटर पुगेको छ। खाना पकाउने एलपी ग्यासको भने मूल्य यथावत (१ हजार ८ सय रूपैयाँ) छ।भारतीय आयल कर्पोरेसनले बढाएर मूल्यसूची पठाएपछि नेपालमा पनि मूल्य बढाउनुपरेको निगमको दाबी छ। यसअघि असार ५ गते निगमले पेट्रोल लिटरमा २१ रूपैयाँ र डिजेल तथा मट्टीतेल लिटरमा २७ रूपैयाँ बढाएको थियो। तर त्यसको तीव्र विरोध भएपछि असार ११ गते आयल निगमले पेट्रोलमा २० रूपैयाँ डिजेल र मट्टीतेलमा २९ रूपैयाँ घटाएको थियो।

कोटा प्रणाली लागू गर्न सुझाव

नेपाल आयल निगमले पेट्रोलियम पदार्थ बिक्रीमा कोटा तोक्न सरकारलाई सुझाव दिएको छ। निगमले सोमबार प्रधानमन्त्री, उद्योग वाणिज्य मन्त्रालय र गृह मन्त्रालयलाई पेट्रोलियम पदार्थको खपत घटाउनका लागि बिक्रीमा कोटा तोक्न सुझाएको हो।

निगमले मोटरसाइकल र स्कुटरलाई एक पटकमा पाँच लिटर र कार, जिपलगायत साना सवारीसाधनलाई २० लिटरमात्रै इन्धन दिन प्रस्ताव गरेको छ। इन्धन खपत घटाउन के गर्न सकिन्छ भनेर सरकारले सुझाव मागेपछि निगमले यस्तो प्रस्ताव गरेको हो।

यसअघि निगमले इन्धन खपत घटाउन साताको दुई दिन सार्वजनिक बिदाको प्रस्ताव गरेको थियो। सरकारले प्रस्ताव कार्यान्वयन पनि गर्यो, तर त्यो एक महिना पनि टिकेन।

निगमले इन्धन खपत घटाउन सवारीसाधनमा जोरबिजोर प्रणाली कार्यान्वयनमा ल्याउन पनि सुझाव दिएको छ। सार्वजनिक तथा अत्यावश्यक सेवाका बाहेक सरकारी र निजी सवारीसाधनमा जोरबिजोर प्रणाली कार्यान्वयन गर्न निगमको सुझाव छ।

निगमले विद्युतीय सवारीसाधनको प्रयोगमा वृद्धि गर्न प्रमुख सहर र राष्ट्रिय राजमार्गहरुमा निःशुल्क चार्जिङ स्टेसन निर्माण गर्न तथा सार्वजनिक एवं निजी पार्किङ स्थानमा विद्युतीय सवारीसाधन निःशुल्क पार्किङको व्यवस्था गर्न पनि सुझाएको छ। निगमले छोटो दुरीमा सवारीसाधनको सकभर प्रयोग नगरी पैदल यात्रा गर्न पनि आह्वान गरेको छ।

निगमले सबै सवारीसाधनमा उपलब्ध सिटअनुसार यात्रु राखेर चलाउने व्यवस्था गर्न पनि सुझाव दिएको छ। कुनै पनि सवारीसाधन खाली हिँड्न निरुत्साहित गर्नुपर्ने निगमको भनाइ छ।